БИШКЕК, 27-окт. — Sputnik. "Тазалык" муниципалдык ишканасы күз-кыш мезгилине толугу менен даяр экенин аталган мекеменин жетекчилиги журналисттер менен жолугушууда билдирди.
Маалыматка ылайык, күз-кыш мезгилинин тазалап-жыйноо маалы 1-ноябрдан 1-мартка чейинки учурга туура келет.
Ишкана жолдордун абалына көзөмөл жүргүзүүчү атайы бригадалар дайындаларын, алар жолдорго керек учурда кум, туз сээп турарын белгилейт.
"Күз-кыш мезгилине карата 2946 тонна кум, 321 тонна туз даярдалды. Жалпы жонунан 7500 тонна кум жана 550 тонна туз талап кылынат. Учурда инерттүү материалдар шаар аймагына ташылууда", — дешти ишкана өкүлдөрү.
"Тазалык" ишканасында бүгүнкү күндө 18 кар тазалоочу унаа, төрт грейфердик жүк ташуучу унаа, 15 самосвал, беш щеткалуу трактор жана Т-25 үлгүсүндөгү бир трактор ишке даяр.
Мындан тышкары, билдирүүдө аялдама менен жөө киши баскан жолдорду кардан 590 киши тазалап, 113 жүк ташуучу жумушчу кол менен унааларга кар жүктөй турганы белгиленет.
