БИШКЕК, 6-ноя. — Sputnik. Кара-Суу районундагы "Кайнар" кенинде көмүр казууга барып, топурак басып каза болгон окуучулар ата-энесинен суранбай кеткен. Бул тууралуу райондук акиминин биринчи орун басары Мурадин Тешебаев билдирди.
Анын айтымында, каза болгон алтынчы жана сегизинчи класстын окуучулары жана 22 жаштагы жаран көмүрдү казып чыгып сатуу үчүн шахтага киришкен.
"Алар ата-энесине айтпай эле шахтага келишкен. Каза болгон окуучулар эки башка үй-бүлөнүн балдары. Бирөөсү балдардын эң улуусу болсо, экинчиси эң кичүүсү болгон", — деди ал.
Ал ошондой эле, учурда райондун акими кырсык болгон жерге барып, эл менен жолугуп жатканын кошумчалады.
Маалыматка ылайык, кырсык 5-ноябрь күнү саат 12.00дө болгон. Каза болгондор Папан айыл аймагындагы Кожокелен айылынын тургундары экени аныкталды. Бирөөсү 22 жаштагы жигит, калган экөө алтынчы жана сегизинчи класстын окуучулары болгон.
