БИШКЕК, 7-ноя. — Sputnik. Улуттук статистикалык комитеттин маалыматы боюнча өлкөнүн алты миллионунчу жараны 26-ноябрь күнү төрөлө турганын өкмөттүн маалыматы кызматы кабарлады.
Буга чейин калк санын алты миллионго жеткире турган наристенин 16-ноябрь күнү жарыкка келери айтылган.
Премьер-министр Темир Сариевдин буйругу менен алты миллионунчу кыргызстандыктын төрөлүшүнө карата өткөрүлө турган иш-чараларды иштеп чыгуу үчүн жумушчу тобу түзүлдү. Аталган маселе боюнча жумушчу топтун алгачкы жыйынын вице-премьер Гүлмира Кудайбердиева өткөрдү.
Статкомдун маалыматына ылайык, 2015-жылдын 1-августуна карата кыргызстандыктардын саны 5 миллион 964 миң кишини түзгөн.
Кыргызстандын беш миллионунчу жараны Тынчтык 2002-жылы 27-августта Кенжебек Курамаев менен Бакбүбү Жапарованын үй-бүлөсүндө төрөлгөн. Азыр ал 13 жашка толду.
