БИШКЕК, 7-ноя. — Sputnik. Россиянын премьер-министри кыргызстандык кесиптеши Темир Сариевди өкмөт башчылыгына кайра дайындалышы менен куттуктаганын Россия өкмөтүнүн маалымат кызматы билдирди.
Президент Алмазбек Атамбаев бейшемби күнү Темир Сариевди премьер-министрликке дайындоо боюнча буйрукка кол койгон. Ага чейин Жогорку Кеңештин жаңы чакырылышы бир добуштан өкмөттүн курамын бекиткен.
"Орус-кыргыз стратегиялык өнөктөштүктү мындан ары да кеңейтүү, соода-экономикалык, илимий-техникалык, гуманитардык кызматташууну активдештирүү, ЕАЭБ алкагында өз ара натыйжалуу аракеттешүү эки мамлекеттин кызыкчылыгына толук жооп берет", — деп айтылат куттуктоодо.
Сариев биринчи жолу премьер-министр болуп 2015-жылдын жазында келген. V чакырылыштагы парламенттин иши аяктагандан кийин өкмөт толук курамы менен отставкага кеткен.
