БИШКЕК, 10-ноя. — Sputnik. Илимий изилдөөлөргө материалдык жактан өбөлгө түзүүнүн ийкемдүү формаларын киргизүү абзел, деди президент Алмазбек Атамбаев илим адамдарын кесиптик майрамы менен куттуктап жатып.
Анын айтымында, кандай гана өлкөнүн болбосун социалдык-экономикалык өнүгүшүн тездетүүнүн эң орчундуу өбөлгөсү болуп эсептелген адам капиталын түзүүдө илим өзгөчө мааниге ээ.
"Учурда илимдин натыйжалуулугун жогорулатуунун заманбап механизмдерин ишке киргизип, илимий чөйрөдө атаандаштык кырдаалды түзүү керек. Изилдөөлөргө материалдык жактан өбөлгө түзүүнүн ийкемдүү формаларын киргизүү абзел. Илимпоздордун коомубуздагы аброюн арттыруу саясатын так жүргүзүп, илимге жаш, таланттуу күчтөрдүн келиши үчүн шарт түзүү, илимдин өндүрүш менен байланышын чыңдоо – биздин максатыбыз, — деп айтылат куттуктоодо.
Куттуктоосунун соңунда өлкө башчы илимпоздорго чың ден-соолук, бак-таалай жана Кыргызстандын жаркын келечегине арналган илимий ишмердигиңиздерге ийгиликтерди каалады.
