БИШКЕК, 13-ноя. — Sputnik. Улуттук коопсуздук боюнча мамлекеттик комитети (УКМК) интернетте Россиянын Сириядагы аракеттерин сынга алып, ага каршы жихат жарыялаган бала чындап эле Кыргызстандын жараны экенин аныктады. Бул тууралуу аталган комитеттин маалымат кызматы билдирет.
Октябрь айынын ортосунда колуна курал кармап, башка согушкерлер менен биргеликте Россиянын Сириядагы аскердик аракеттерин сынга алып, Россияга жихад жарыялаган кыргызстандык бала тууралуу видео тараган.
Аныкталган маалыматтар боюнча, Бакыбеков 2014-жылдын декабрында араб тилин үйрөнүү максатында окууга чет өлкөгө чыгып кеткен.
Аталган жарандын экстремисттик жана террористтик чакырыгына байланыштуу УКМК Кылмыш жаза кодексинин 226-4 беренеси ("КРдин жарандары чет өлкөнүн аймагында куралдуу жаңжалдарга, же согуш аракеттерине катышуусу же террористик жана экстремистик даярдоолордон өтүү) боюнча кылмыш ишин козгоду.
Белгилей кетсек, Кыргызстандын жарандары чет өлкөдөгү куралдуу жаңжалдарга, же согуш аракеттерине катышуусу же террористик жана экстремистик даярдоолордон өтүү аракеттери кылмыш жоопкерчилигине тартылып, беш жылдан сегиз жылга чейин эркинен ажыратылат. Ошондой эле алдын ала көмүскө топ түзүп, же уюшкан кылмыштуу топ түзсө сегиз жылдан он эки жылга чейин эркинен ажыратуу жазасы каралган.
