БИШКЕК, 20-ноя. — Sputnik. Пакистандык жаран кыргызстандык жубайына балдарын берүүдөн баш тартып жатканын Акыйкатчы институту билдирди.
Учурда Пакистанда жашап жаткан аял акыйкатчынын милдетин аткарып жаткан Гүлнара Жамгырчиевага арыз менен кайрылып, атасы менен жүргөн эки жана беш жаштагы балдарын кайтарууга жардам берүүсүн өтүнгөн.
Бул факт боюнча аял Пакистандын сотуна кайрылган. Сот балдардын энесинин пайдасына чечим чыгарып, наристелерди аялга кайтарып берүүгө милдеттендирген. Бирок, бүгүнкү күнгө чейин соттун чечимин колуна тийгизе албай жүрөт.
Укук коргоочулар кыргызстандык аялдын жана анын балдарынын укугу одоно бузулган деп эсептешүүдө.
Жамгырчиева ТИМ башчысы Эрлан Абдылдаевге кат жолдоп, аталган көйгөйдү чечүүгө жардам берүүсүн өтүндү.
