БИШКЕК, 25-ноя. — Sputnik. АКШнын Куралдуу аба күчтөрүнүн жетекчисинин орун басары генерал-лейтенант Том Макинерни Түркия россиялык "Су-24" учагын атып түшүрүп, чоң ката кетирди деген пикирин билдирди.
Америкалык аскерийдин айтымында, радар трекерлери учак Түркиянын чет жакасын кесип өтүп, Түркиянын аба аймагында 20-40 секунд гана болгон. Андан соң "Су-24" артка Сирияга кайта баштаган.
"Учак аймакка чабуул кылыш үчүн маневрларды жасаган эмес", — деди Макинерни Fox News телеканалына берген маегине.
Россия президенти бул кадамды террорчуларга жардам кылгандар тарабынан "аркага сайылган бычак" деп атады. Ал эми Россиянын Башкы штабы соккуга кабылган "Су-24" Түркиянын аймагын кесип өтпөгөндүгүн жана муну абадан коргонуу боюнча сириялык күчтөр бекемдеп жаткандыгын маалымдады. Ал эми Түркия россиялык аскер учагы анын аба мейкиндигине кирип кеткендигин айтууда.
