БИШКЕК, 27-ноя. — Sputnik. Түркия президенти Режеп Тайып Эрдоган Россия башчысы Владимир Путинге 30-ноябрь күнү Парижде жолугуп сүйлөшүүнү сунуштады.
Бул күнү Парижде климатка арналган эл аралык конференция башталмакчы. Ага Елисей сарайынан берилген маалыматка ылайык, 138 өлкөнүн мамлекет жана өкмөт башчылары катышат. Путин конференциянын ачылышында сүйлөй турганын анын жардамчысы Юрий Ушаков маалымдаган.
"Мен Россия президенти менен жолугушууну сунуштадым, азырынча жооп ала элекмин", — деп билдирди Эрдоган бейшемби күнү France 24 телеканалына маек берип жатып.
Россия менен Түркиянын ортосундагы мамилеге шейшемби күнү Сирияда россиялык Су-24 учагынын кыйрашынан кийин доо кеткен. Россия президенти Владимир Путин учакты Түркиянын F-16 ракетасы менен атып түшүргөнүн, учак Сирия менен Түркиянын чек арасынан төрт чакырым алыстыкта жерге түшкөнүн билдирген. Мындай аракетти Путин террористтерди колдоочулардын "аркага сайылган бычагы" деп баалаган.
