БИШКЕК, 28-ноя. — Sputnik. Түркия президенти Режеп Тайип Эрдоган россиялык учактын кыйрашына байланыштуу кырдаал аны абдан капа кылганын билдирип, кийин буга окшогон окуя кайталанбай турганына ишеним артарын билдирди.
Эрдогандын сөзүн NTV телеканалы түз алып көрсөттү.
"Бул окуя бизди абдан капага салды. Биз бул маселени чечип, жолун табабыз деп ишенем. Дүйшөмбү күнү Парижде өтө турган климаттык саммит Россия менен болгон мамилени жөнгө салуучу аянтча болуп бериши мүмкүн. Каршылашуу эч кимге пайда алып келбейт. Россия канчалык Түркия үчүн маанилүү болсо, Түркия да Россия үчүн орчундуу орунду ээлейт. Биз бири-бирибизди жокко чыгарып сала албайбыз", — деди өлкө башчы.
Россия менен Түркиянын мамилесине шейшемби күнү россиялык Су-24 учагынын Сирия аба мейкиндигинен түркиялык аскерлер тарабынан атып түшүрүлүшүнөн кийин доо кеткен. Россия президенти өнөктөштүн мындай аракетин "аркага сайылган бычак" деп баалап, учурда өкмөт Түркиянын аракетине карата экономикалык чектөөлөрдү даярдап жатат.
