БИШКЕК, 4-дек. — Sputnik. Бүгүн жети күндүк Манас айтуу иш-чарасы аягына чыгат.
Көпчүлүктүн суранычы менен "Семетей" окуясынан башталган. Улуу жомокту белгилүү манасчы Таланталы Бакчиев баштап айтып, аны Рыспай Исаков, Замир Баялиев, Самат Көчөрбаев, Дөөлөт Сыдыков, Улан Исмаилов, Үмөт Болот уулу, Камил Мамадалиевдер улап айтышты.
Иш-чарада Дөөлөт Сыдыков "Манастын төрөлүшүн" 9 саат бою тынбай айтып, эң узак айткан манасчы болуп калды.
Быйылкы Манас айтуу былтыртан бери 4-декабрда белгиленип келе жаткан "Манас күнүнө" утурлай уюштурулган. Бул күнү Бишкектеги "Манас айылы" этнокомплексинде залкар манасчы Саякбай Каралаевдин эстелиги ачылып, "Манас күнү" Абдылас Малдыбаев атындагы кыргыз улуттук опера жана балет театрында салтанаттуу белгиленет.
