БИШКЕК, 4-дек. — Sputnik. Жайыл районунда жети тоннадан ашуун күйүүчү майды жер алдына катылган челектерден сатып жаткан 22 жаштагы келин кармалганын ИИМ билдирди.
Маалыматка ылайык, майды тымызын сатуу максатында ири көлөмдөгү челектер үчүн жер казылып, атайы орун даярдалган. Текшерүү учурунда жер алдынан 200 литрлик жети челек, бир тонналык эки цистерна жана 4 тонна 700 литрлик бир цистерна аныкталган.
Кармалган жаран майды Казакстанга кетип бара жаткан унаалардан 28 сомдон сатып аларын, кайра бир литрин 30 сомдон сатып жатканын айткан. Мында ал мамлекетке бир да сом салык төлөгөн эмес. Дизель майы эч документсиз бардык шарт-талаптарга каршы сатылып келген.
Учурда бардык жыйналган материалдар тийиштүү мамлекеттик органдарга берилди.
