"Элдик демилге": дин аалымдарына кол салгандарга жаза күчөтүлүшү керек

БИШКЕК, 10-дек. – Sputnik. Терроризм идеологиясына каршы чыгып жүргөн имамдарды, окумуштууларды, эксперттерди, теологдорду коргоо жана кепилдик берүү жөнүндө мамлекеттик программа кабыл алуу керек деген сунушун "Элдик демилге" коомдук саясий кыймылынын төрагасы Жеңиш Молдокматов тегерек столдо билдирди.

Анын айтымында, өлкөдө акыркы кезде болгон окуялардан улам Коргоо кеңеши кезексиз жыйынга чогулушу керек.

Аталган коомдук кыймылдын мүчөлөрү президент Алмазбек Атамбаевге, өкмөт башчы Темир Сариев баштаган тийиштүү мамлекеттик органдарына кайрылуу жолдоп, өлкөдөгү диний абалды, террордук жана экстремисттик коркунучтардын алдын алуу боюнча өз сунуштарын айтышты.

Молдокматов мамлекет дин менен терроризмди так ажыратып берүүсү керек деген пикирин билдирди.

Белгилей кетсек, ноябрь айынын аягында теолог Кадыр Маликовго бейтааныш эки киши бычак менен кол салып, бетине бычак урган. Оор жаракат алган Маликов ооруканага жеткирилип, шашылыш операция жасалган. Теолог ага кол салгандар ДАИШтин өкүлдөрү деп шектенгендигин билдирген. Кылмышкерлер анын ДАИШ террордук уюмунун ишмердигин сындаган үчүн кол салды деген пикирин айткан. 

ИИМдин маалыматында Кадыр Маликовго кол салды деген жарандар Түркиядан кармалып, учурда аларды Кыргызстанга алып келүү боюнча аракеттер жүрүп жатат.