БИШКЕК, 10-дек. — Sputnik. Армиядагы тартипке өзгөчө көңүл буруп, аскерлер арасында уставдык эмес мамилелерди толугу менен жок кылуу керектигин премьер-министр Темир Сариев Коргоо иштери боюнча мамлекеттик комитеттин төрагасы Марат Кенжисариевди кабыл алуу учурунда билдирди.
Өкмөт башчы аталган комитеттин алдында Куралдуу күчтөрдүн жеке курамынын жана материалдык-техникалык сапатын жакшыртуу боюнча чоң жоопкерчилик турганын билдирди. Премьер-министр армиядагы тартипти күчөтүүгө өзгөчө көңүл буруу зарылдыгына токтолду.
"Армиядагы моралдык-психологиялык абалда бир катар кемчиликтер кетип, айрым аскерлер өз өмүрүнө кол салууга чейин барган учурлар катталууда. 2014-жылы 7 аскер өз жанын кыйса, быйыл бир жоокер каза болду. Ошондуктан, тартипке өзгөчө көңүл буруп, аскерлер арасында уставдык эмес мамилелерди толугу менен жок кылуу тапшырмасы турат", — деди Сариев.
Өз кезегинде Кенжисариев учурда жарандарды аскерге чакырууда психологиялык саламаттыгы жана даярдыгына өзгөчө көңүл бурулуп жатканын баса белгилеп, аскер бөлүктөрүндө тамак-аш камсыз кылууну аутсорсингге өткөрүү каралып жатканын маалымдады.
