БИШКЕК, 15-дек. — Sputnik. Бишкекте ушул жума аралыгында калкты тейлөөнүн эң ири борбору ачыла турганын Мамлекеттик каттоо кызматынын төрагасы Тайырбек Сарпашев борборду ачуу боюнча даярдыкты көрүү учурунда билдирди.
Сарпашев жаңы борбор Бирдиктүү терезенин шарты менен иштей турганын, ал жарандарга ID-карт же жалпы жарандык паспорт алуу же алмаштыруу үчүн керектүү документтерди алууга мүмкүнчүлүк бере турганын белгиледи.
"Эки сааттын ичинде паспорт алуу борбордун дагы бир жаңылыгы болуп калмакчы. Мындан тышкары, жарандар үчүн бланктарды электрондук форматта толтурууга шарт түзүлөт", — деди мекеменин төрагасы.
Жаңы борбордо аймак аралык паспорт столу, Свердлов районунун паспорт-визалык жана каттоо бөлүмү, Свердлов жана Аламүдүн райондорунун жарандык абалдын актыларын каттоо бөлүмдөрү жайгашкан. Имарат Чолпон-Ата менен Анкара көчөлөрүнүн кечилишинен орун алып, 1300 чарчы метр аянтты ээлейт.
