БИШКЕК, 16-дек. — Sputnik. Бүгүн Кыргыз Эл жазуучусу, публицист, драматург Мар Байжиевдин чыгармачыл кечеси өтө турганын Маданият, маалымат жана туризм министрлиги билдирди.
Маалыматка ылайык, жазуучунун 80 жылдык мааракесине арналган иш-чара Абдылас Малдыбаев атындагы Кыргыз улуттук академиялык опера жана балет театрында саат 17.00дө башталат.
Салтанаттуу кечеге бийлик өкүлдөрү, чыгармачыл интеллигенция жана күйөрмандардын келиши күтүлүүдө.
Мар Байжиев 1935-жылы Жалал-Абад шаарында жарык дүйнөгө келген. Кыргыз киносунун башатында турган Байжиев көркөм тасмалар боюнча алгачкы редактор болгон. Анын сценарийлеринин негизинде тартылган фильмдер көптөгөн фестиваль-сынактарда байгелүү орундарды ээлеп келген. Байжиевдин пьесалары дүйнөнүн булуң-бурчунун сахналарында коюлуп, театр күйөрмандарынын сүймөнчүгүнө айланган.
