БИШКЕК, 20-дек. — Sputnik. Каржы министрлиги коомчулукка дүң салган планшет жана кресло сатып алуу боюнча өткөрө турган тендерди жойгону тууралуу маалымат Мамлекеттик сатып алуулардын сайтына чыкты.
Үстүбүздөгү жылдын 11-декабрында аталган министрликтин 10 кресло жана эки планшет сатып алуу боюнча тендер жарыялап, ага жарым миллион сомдун тегерегинде каражат жумшоого ниеттенип жаткан.
Каржы министрлигинин кресло жана кымбат баалуу планшеттерди сатып алуу туурасындагы чечими коомчулукту бир топ дүрбөлөңгө салган. Өз кезегинде мекеме заманбап технология учурдун талабы экенин айтып, муктаждык үчүн сатып алынып жатканын айткан. Ал эми креслолор чет элдик делегацияларды кабыл алуу үчүн конференц-залга коюлмак.
Бул коомчулуктун сын пикиринен кийин өтпөй калган биринчи тендер эмес. Буга чейин "Манас" аэропорту жаңы жылдык корпоративден баш тартып, ал эми депутаттар эски отургучтары менен калган.
