БИШКЕК, 21-дек. — Sputnik. Кыргызстанда буга чейин тыюу салынган кумарканаларды кайра иштетүү сунушталып жатат. Мындай мыйзам долбоорун Экономика жана өнөр жай министрлиги иштеп чыкты.
Мекеме 2012-жылдын 1-январынан тартып кумар оюндарына, ал эми 2015-жылдан тарта тотализатор жана букмекер жайларына тыюу салынганын белгилейт. Кумар оюндары көмүскөгө кетип, мындан бюджет 500 миллион сомдон куру жалак калса, беш миң адам жумушсуз калган.
Министрлик кумар оюндарына мамлекеттик көзөмөл жана башкаруу керектигин айтууда. Бул үчүн кумар оюндарына уруксат берилүүчү атайылаштырылган эл аралык соода-көргөзмө борборун ачуу сунушталып жатат.
"Мында чет элдик жарандар үчүн атайы аймакта гана ойноого мүмкүнчүлүк берилет", — деп айтылат мыйзамдын долбоорунда.
Сунуш Россия, Казакстан, Сингапур, АКШ жана Монако сыяктуу мамлекеттердин тажрыйбасынын негизинде иштелип чыкты.
