БИШКЕК, 7-янв. — Sputnik. Ош шаарынын 12 жашар тургуну Бермет Деңизова Россиянын Великий Устюг жергесинен келген Аяз Атадан белек алды. Бул туурасында Sputnik Кыргызстан маалымат агенттигинин түштүк аймак боюнча кабарчысы билдирди.
Деңизова Аяз Атага катты беш жыл мурда, биринчи класста окуп жатканда жазыптыр.
"Аяз Атанын бар экенине ишенчүмүн, менин катым ага жетеээрин билгем", — деди окучу кыз.
Берметтин апасы Парзагүл Деңизованын айтымында, мындан туптуура беш жыл мурда кызы экөө почтага барып, Аяз Атага жазылган катты жөнөтүшкөн.
"Кызым азыр бешинчиде окуйт, Жаңы жыл алдында дайыма кат жазчу. Ал эми Аяз Атага жолугуп, андан белек алуу Бермет үчүн абдан кубанычтуу окуя болду", — деди ал.
Бермет Ош шаарына Великий Устюг жергесине Аяз Атага кат жөнөткөн бирден-бир окуучу.
Быйыл Кыргызстандан аталган аймакка 12 окуучу Бишкек, Ош жана Каракол шаарларынан кат жазышкан.
Великий Устюг — Россиядагы шаар, Вологда облусундагы Великоустюг районунун административдик борбору. Орустун түндүгүндөгү элдин бай мурастарын сактап калган байыркы шаарлардын бири. 1999-жылдан тарта россиялык Аяз Аталардын мекени деп жарыяланган.
