БИШКЕК, 9-янв. — Sputnik. Түндүк Корея суу алдындагы кемеден баллистикалык ракетаны учуруп, сынагандыгын жар салган жаңы видеону көрсөттү. Бул болжол менен 21-декабрда жасалган.
Видео Түндүк Кореянын борбордук телеканалынан көрсөтүлдү. Ал былтыркы жылдын май айында жасалган сыноодон айырмаланып турат деп жазат РИА Новости.
Жаңы роликте ракета асманга тик көтөрүлсө, ал эми май айындагысында бурчу 45 градусту түзүп, андан соң деңизге кулап түшкөнү көрсөтүлгөн эле. Эксперттер былтыркы жаздагы сыноону ийгиликсиз болду деп эсептешкен.
Видеодо Кореянын азыркы лидери Ким Чен Ын пальто, башына шляпа кийип турат. Ракета ылдамдык менен асманга көтөрүлүп, артынан жарк эткен гана чекитти калтырып, булуттарды жиреп кеткендиги көрүнөт.
Баяндамачылар аталган ролик Түндүк Кореянын армиясынын канчалык кубаттуу экендигин жана мүмкүнчүлүгү улам өсүп бара жаткандыгын көрсөтүп турат деген пикирди айтышууда. Алар өзөктүк куралды сынаган бул окуя дүйнө коомчулугу менен өлкө жарандарына катуу таасир калтырат деп эсептешет.
Буга чейин Түштүк Кореянын коопсуздук кеңеши менен Япония Түндүк Кореяда болгон шектүү жер титирөөдөн улам, шашылыш түрдө жыйын чакырган. Коомчулук да бул жагдайга тынчсыздангандыгын билдирген эле.
