БИШКЕК, 9-янв. — Sputnik. Бишкек шаарындагы Жибек Жолу көчөсүнөн Чыгыш автовокзалга жакын жерден күмүш түстүү оң рулдуу Лексус 350 автоунаасы 25-30дар чамасындагы аялды коюп кеткенин Sputnik Кыргызстан маалымат агенттигинин кабарчысы жеринен билдирди.
Маалыматка ылайык, жол тандабастын айдоочусу окуя болгон жерден автоунаасы менен качып кеткен. МАИ кызматкерлери унааны таап, бирок айдоочусун издеп жатышат деген маалымат бар экенин кабарчы кошумчалады.
Өзүн Сагын деп тааныштырган күбө автомашина коюп кеткен кыздын жанында дагы бир киши болгонун айтат.
"Лексус автоунаасы катуу ылдамдыкта келип, жолдон өтүп бараткан аял менен кишини коюп кетти. Машина токтогон да жок", — дейт ал.
Күбө ошондой эле, каза болгон кыздын жанындагы киши да машинага урунганын, ал басып жүрүп окуя болгон жерден таксиге түшүп кетип калганын кошумчалады.
Лексус автоунаасы чыгыштан батышты көздөй келе жаткан.
Кырсык болгон жерде тез жардам кызматы менен МАИ кызматкерлери иштеп жатат. Аталган айматан машиналар араң өтүп жатат.
