БИШКЕК, 10-янв. — Sputnik. Bloomberg агенттигинин миллиардерлердин индекси көрсөткүчүнө ылайык, дүйнөнүн эң бай деген 400 кишиси 2016-жылдын алгачкы жумасында 194 миллиардга жакын долларынан кол жуушту.
Bloomberg Business белгилегендей ишкерлер өз байлыгынан Кытай экономикасынын чабалдыгынан, нефтинин баасынын төмөндөшүнөн жана американын ири фондулук биржасынын кыйрашынан улам ажырашкан.
Көп жылдардан бери эң бай адамдардын көч башында келген Билл Гейтс 4,5 миллиард долларын (байлыгынын 5,4 пайызы) жоготкон. Ал эми Inditex компаниясынын негиздөөчүсү Амансио Ортега 3,4 миллиард долларынан (байлыгынын 4,7 пайызынан) кол жууган. Ири телекоммуникациялык магнат мексикалык ишкер Карлос Слим байлыгынын 10,8 пайызынан айрылган.
