БИШКЕК, 11-янв. — Sputnik. Мындан эки күн мурда өзбекстандык чек арачылардан бутуна ок жеген аксылык жаран Кыргызстанга кайтарылды. Бул туурасында Мамлекеттик чек ара кызыматынын маалымат кызматы билдирди.
32 жаштагы жаран "Кенсай-авто жолу" көзөмөл өткөрүү жайынан кыргызстандык чек арачыларга өткөрүлүп берилди. Учурда анын абалы канааттандырарлык, Шамалдуу-Сайдагы медициналык жайга жаткырылып, дарыгерлердин көзөмөлүндө алынды.
Жалал-Абад облусунун Аксы районундагы Сары-Көпүрө аймагынын такталбаган тилкесинде өзбек чек арачылары менен кыргыз жарандарынын ортосунда чыр чыгып кеткен. Аны кесепетинен, өзбек чек арачылары курал колдонуп, кыргызстандык жаран бутуна ок жеген. Ок жеген жаран Аксы районунун Дерес айылынын 32 жаштагы тургуну болуп чыккан.
