Фотограф Александр Федоров Sputnik Кыргызстан маалымат агенттигине Болот Шамшиев менен бир топ картиналарды тартуу учурунда иштешип калгандыгын эске салды. Ал атактуу режиссердун актерго ролду, образды ийне-жибине чейин түшүндүрүп бере алган мыкты сапатын айтып берди.
"Ак кемени" экрандаштыруу учурунда кээ бир эпизоддорго ичи чыкпаган режиссер 18-20 дубль менен тарткан экен.
"ВГИКте режиссердук факультетте окуп жүрүп, 1963-жылы Лариса Шепитько тарткан "Аптап" тасмасында актер катары дебютун аткарган. Болот автор, режиссердун акыйкаттык менен жакшылык баары бир жеңет деген оюн ишенимдүү, мыкты ойноп, актердук чеберчилигин көрсөткөн. Албетте, бул көптөрдү таңгалдырган", — деди Федоров.
Ал кино сүйүүчүлөрдүн көбү Болот Шамшиев документалдуу кино дүйнөсүнө режиссер катары жасаган биринчи кадамы — "Манасчы" менен "Чабан" бир топ аттуу-баштуу сыйлыктарга татыгандыгын белгиледи. Ал эми кийинки шедевр тасмаларынын баары бедели бийик болгон эл аралык жана бүткүл союздук сыйлыктарын биринен сала экинчисин алып турган.
Ал "Манасчы", "Чабан", "Караш ашуусундагы атышуу", "Ысык-Көлдүн кызгалдактары", "Сүйүү жаңырыгы", "Ак кеме", "Адамдардын арасында", "Эрте жаздагы турналар", "Бөрү зындан", "Снайперлер", "Фудзиямага чыгуу" тасмаларынын жаратуучусу.
Акын Төлөн Шамшиевдин уулу.
