БИШКЕК, 18-янв. – Sputnik. Депутат Иса Өмүркулов жетектеген Жогорку Кеңештин Транспорт, коммуникациялар, архитектура жана курулуш боюнча комитетин оң рулдуу автоунаалар менен эл ташууга салынган тыюунун мөөнөтүн узартуу демилгесин көтөрүп жатат.
Комитет жетекчиси Өмүркулов аталган министрлик тарабынан ЖКга айып пулдун ченемин аныктап берүү сунушу түшкөндө, эл нааразы боло баштагандыгын Sputnik Кыргызстанга комментарий берип жатып билдирди.
"Кыргызстанда миңдеген жарандар оң рулдуу унааларды коммерциялык негизде колдонгондуктан, ага бир күндө эле тыюу салып коюу мүмкүн эмес. Буга ылайык, "Автомобиль транспорту жөнүндө" мыйзамга өзгөртүү киргизүүнү сунуштап жатабыз. Анда тыюу мөөнөтүн 2018-жылга чейин узартуу каралган",— деп билдирди депутат.
Ал эми ИИМдин жол кайгуул кызматынын катчысы Тилек Оторов бул жаатта төмөнкүдөй пикирин билдирди.
"Өлкөдөгү жалпы унаалардын 30 пайызы оң рулдуу унаалар. Алар жол кырсыктарынын көбөйүшүнө шарт түзүп жаткандыктан, ИИМ быйылтан тарта административдик чара көрүү позициясын колдойт",— деди Оторов.
Бирок, депутат Иса Өмүркуловдун билдирүүсүнө караганда, оң рулдуу унааларга тыюу салууга жарандар дагы, Ички иштер министрлиги дагы даяр эмес. Себеби, ИИМ кызматкерлери унаалардын коммерциялык негизде колдонулуп жаткандыгын аныктоочу механизмди сунуштай алган эмес.
"Айдоочулар өздөрүнүн туугандарын же кардарларын ташып жүргөнүн жол кайгуул кызматкерлери аныктай албайт. Андай механизм азыр жок. Мындан улам мыйзам долбооруна өзгөртүү киргизүү боюнча сунуш парламентте каралып бүткөнчө айдоочуларга чара колдонулбайт. Мындай чечимге ИИМ менен биргеликте келдик", — деп кошумчалады Өмүркулов.
Эске салсак, "Оң рулдуу унааларды коммерциялык максатта пайдаланууга тыюу салуу жөнүндө" мыйзам 2013-жылы кабыл алынган. Коомчулук аны "элге каршы мыйзам" деп атап, нааразы болушкан.
Акыркы маалыматтар боюнча такси кызматындагы унаалардын үчтөн эки бөлүгүн дал ушул оң рулдуулар түзөт. Мындай кызматтын биринин менеджери аларда иштөөчү 1,5 миң автоунаанын миңге жакыны оң рулдуу экендигин билдирди.
"Мындай автоунаалар бензинди аз жеген үчүн өтө ыңгайлуу, айдаганга жеңил жана дал ушулар биздин бааны көтөрбөй кармап турганга мүмкүндүк берип жатат. Таксисттердин көбү машинаны карызга алып, аны төлөш үчүн эки нөөмөттөп иштейт", — деди ал.
Тыюу салуу боюнча демилге мындай унаалар жол кырсыгына көп кабылат деген маалыматтардан улам көтөрүлгөн.
