БИШКЕК, 19-янв. — Sputnik. Президент Алмазбек Атамбаев "Адам органын жана ткандарын трансплантациялоо жөнүндө" мыйзамына өзгөртүү киргизүүгө каршы экенин билдирип, мыйзам долбоорду Жогорку Кеңешке кайтарып берди.
Парламент тарабынан өткөн жылдын ноябрь айында кабыл алынган мыйзамда жакын туугандардын органын же тканын алуу, даярдоо жана алмаштыруу менен алектенүүгө жеке ооруканаларга да уруксат берүү каралган.
Атамбаевдин айтымында, орган жана ткандарды алуу, даярдоо жана трансплантациялоо, жакын тууган-урукту аныктоо, ошондой донор менен оорулуунун макулдугун алуу укугун берүү үчүн медициналык мекемелерди катаал критерийлердин негизинде тандоо зарыл.
"Муну менен бирге донорлордун орган берүүгө макулдугун текшерүүнүн ачык-айкын механизмдерин иштеп чыгуу керек. Оорулууга операциядан кийинки берилген кепилдик күчөтүлүп, жеке медициналык мекемелердин жана ыйгарым укуктуу мамлекеттик органдардын жоопкерчилигин күчөтүү керек", — деп айтылат өлкө башчынын каршылыгында.
Президент сунушталып жаткан мыйзамдын редакциясында өкмөт трансплантациялоого уруксат алган мекемелерди операцияга жасоого уруксат берүү негиздери менен процедураны көзөмөлдөбөстөн, ишмердүүлүгүн жөнгө салуу менен чектелип калганын белгиледи.
Атамбаев аталган мыйзам долбооруна каршы пикирин парламентке жөнөттү.
