БИШКЕК, 22-янв. — Sputnik. Мамлекеттик жаштар иши, спорт жана дене тарбия агенттиги балбан Руслан Түмөнбаевдин кармалышы боюнча эч кандай түшүндүрмө бербей турганын Sputnik Кыргызстан агенттигине билдирди.
Түмөнбаев олимпиадалык спорттун түрү боюнча дирекциянын жетекчисинин орун басары болуп эмгектенет.
Ал милиция тарабынан 21-январдын түнүндө кармалган. Укук коргоо органдарынын билдирүүсүндө, Түмөнбаевдин "Лексус 330" үлгүсүндөгү унаасы токтотулгандан кийин анын эч кандай документи жок экени белгилүү болгон. Унаа айып короого токтотулгандан кийин спортчу милиция кызматкерлерин тапанча менен опузалап коркуткан.
Бул боюнча Октябрь райондук ИИБ тарабынан Кылмыш жана жаза кодексинин "Газ куралын мыйзамсыз алып жүрүү, сатуу, сактоо" жана "Бийлик өкүлүнө карата зордук-зомбулук көрсөтүү" беренелеринин негизинде кылмыш иши козголду.
Учурда спортчу убактылуу кармоочу жайга киргизилип, тергөө амалдары жүрүп жатат.
