БИШКЕК, 29-янв. – Sputnik. АКШнын президенти Барак Обама өз администрациясына Ливиянын "Ислам мамлекети" террордук уюму менен күрөшүн колдоого чакырды.
"Президент улуттук коопсуздук боюнча иштеген кызматкерлерге Ливия жана бир катар мамлекеттерде бийлигин орнотууга ниет кылып жаткан "Ислам мамлекетине" каршы күрөшкө колдоо көрсөтүүгө тапшырма берди", — деп айтылат Ак үй тараткан маалыматта.
Президент АКШ "Ислам мамлекетинин" ячейкалары кайсы өлкөдө жайгашса, ошол өлкөгө терроризм менен күрөшүүгө колдоо көрсөтөөрүн билдирген. Ал террорчулар барган жеринде, алсызыраак өлкө болсо эле бийлигин бекемдегиси келет деп кошумчалаган.
Дүйнөлүк коомчулук АКШнын "Ислам мамлекетине" каршы Ливияда жасай турган согуштук операциясынын башталышын кызуу талкуулап жаткан кез. Бирок, расмий Вашингтон азырынча бул туурасында үстүртөдөн сөз кылып жатат. Муаммар Каддафини бийликтен алып алып түшүп, өзүн өлтүргөндөн кийин аталган өлкөдө жарандык согуштун оту өчпөй келе жатат.
Буга чейин Коргоо министри Эштон Картер АКШ бийлиги Ливия аймагында жайгашкан "Ислам мамлекетинин" аймактарын бомбалоо боюнча чечим кабыл ала электигин билдирген.
