БИШКЕК, 3-фев. — Sputnik. Бүгүн депутаттык мандаттан ажыратылган Урмат Ишенбеков Борбордук шайлоо комиссиясынын токтомун колуна алып, ал менен таанышкандан кийин тийиштүү чараларды көрө турганын Sputnik Кыргызстан маалымат агенттигине билдирди.
БШКнын мүчөсү Жеңиш Акматов Ишенбековду мандатынан ажыратуу процесси өзүнүн жана фракция жетекчисинин суранычы менен кийинкиге калтырганын билдирген. Алар маселени өз ара чечип алышы керек болчу.
Өз кезегинде Ишенбеков фракция лидери менен чечишип ала турчу деле маселеси жок экенин айтат.
"Менин чечишчү деле маселем жок эле", — деди ал.
Белгилей кетсек, буга "Кыргызстан" саясый партиясынын тизмеси менен депутат болуп келген Элмира Жумалиева, Чолпон Эсенамановалар БШКнын чечими менен мандатынан ажыратылган болчу.
