БИШКЕК, 3-фев. — Sputnik. Борбордук мамлекеттик архивдин кызматкерлери Россиянын Красногорск шаарынан кыргыз элинин ХХ кылымдын башындагы тиричилигин, жашоосун, маданиятын чагылдырган даректүү тасма менен сүрөттөрдү алып келишти. Бул тууралуу Мамлекеттик каттоо кызматы билдирди.
Маалыматка ылайык, Кыргызстан жөнүндөгү кинофотодокументтер каталог, монтаж барактары жана үн монтаждоо жайында каралды. Натыйжада 300дөн ашуун даректүү тасма жана 1000 сүрөт табылган.
"Эң алгачкы фотодокумент 1900-жылы жасалса, биринчи кинодокумент 1917-жыл менен белгиленген", — деп айтылат билдирүүдө.
Ал эми 30 фотодокументтин ичинде 1900-1940-жылдар аралыгында тартылган сүрөттөр камтылган. Анда Кыргыз АССРнин төрагасы Абдыкадыр Орозбеков, автономиялуу облустун Кыргыз Автономиялуу Советтик Социалисттик республикасы болуп түзүлүшүндөгү салтанаттуу жыйындын катышуучулары түшүрүлгөн.
Кыргызстанга Россиянын Федералдык архив кызматы бардык документтердин копиясын келишим баа менен берди.
Адистердин айтымында, бул жааттагы иш КМШ өлкөлөрүнүн архивдери менен да уланмакчы.
