Москвада өрттөн каза болгон КР жарандары боюнча тергөө иштерине жакындары да катышууда

БИШКЕК, 4-фев. — Sputnik. Москвадагы тигүү цехинде чыккан өрттөн каза болгондор боюнча тергөө иштери улантылууда. Бул тууралуу Sputnik Кыргызстан маалымат агенттигине аталган цехтин ээси Аламбек Тогузаков билдирди.

2016-жылы 30-январында Москва шаарынын Сокольники аймагындагы Стромынка көчөсүндөгү өнөр жай имараттарынын биринен өрт чыгып, үч миң чарчы метри күйгөн. Кесепетинин имараттын чатыры кулап, 12 адам каза тапкан. Анын сегизи Кыргызстандын жараны, экөө — Россиянын жарандыгын алган кыргыздар жана эки өзбекстандык бар экени белгилүү болгон.

Тогузаковдун айтымында, каза болгондордун сөөгүн таануу үчүн алардын туугандары Москва шаарына келген.

"Азыр маркумдун жакындары да тергөө иштерине катышып жатат. Алар мейманканага жайгаштырылды", — деди ал.

КР Тышкы иштер министрлигинин маалымат кызматынан билдиришкендей, 2-январда Ош — Москва аба каттамы боюнча каза болгон төрт жарандын үч тууганы учуп кеткенин кошумчалашты.

"Аларды Кыргызстандын Россиядагы элчилигинин кызматкерлери тосуп алып, элчиликтин мейманканасына жайгаштырылды. Аларга керектүү укуктук жана психологиялык жардамдар берилүүдө", — дейт маалымат кызматы.

Эскерте кетсек, каза болгон жарандардын сөөгүн мекенине алып келүүгө өкмөттүн жардам берүүсүн президент премьер-министрге тапшырган. Өз кезегинде премьер-министр Темир Сариев бул окуяны тышкы иштер министри Эрлан Абдылдаевдин жеке көзөмөлүнө алуусунан буюрган.