БИШКЕК, 6-фев. — Sputnik. Бүгүн Кыргыз улуттук драма театрында Кыргыз Эл баатыры 91 жаш курагында каза болгон Сооронбай Жусуевди акыркы сапарга узатуу зыйнаты болуп өттү.
Анда президент Алмазбек Атамбаевдин коштошуу сөзүн өлкө башчынын аппаратынын жетекчиси Фарид Ниязов окуду.
"Сооронбай Жусуевдин дээрлик кылымга тете өмүр жолу согуштан берки Кыргызстан тарыхы менен сапарлаш. Жети жашынан атадан ажырап, бир жагынан жокчулукта чоңойгон Сооронбай ага жаңы бой жеткен кезде кан майданга аттанган. Согуштан оор жаракат менен кайтып келсе да, 70 жылдан ашуун мезгил бою кыргыз коомуна, поэзиясына жана адабиятына ак кызмат өтөдү. Жетим чоңоюп, согуш отун кечип, жаракат алып, андан кийин да бир муундун өмүрүнө тете мезгил бою талыбай эмгек кылуу – бул Кыргызстанда эле эмес, дүйнөдө өтө сейрек көрүнүш", — деп айтылат президенттин сөзүндө.
Жогорку Кеңештин төрагасы Асылбек Жээнбеков Сооронбай Жусуев доордун залкар акыны гана эмес, кыргыз маданиятында, улуттук адабиятта өзүнчө бир чыгармачыл мектепти түптөгөн улуу устат болгонун баса белгиледи.
"Тубаса таланты, поэтикалык дарамети күчтүү, поэзия дүйнөсүндө жаңы чыйыр салып, даңгыр жолго айланткан, өзүнчө чыгармачылык мектеп түптөгөн акындар чанда кездешет. Алардын көч башында Сооронбай Жусуев турат", — деди спикер.
Ал эми премьер-министр Темир Сариев акын Сооронбай Жусуевдин кыргыз адабияты, маданиятында өзгөчө орду бар экенин белгилеп, маркумдун үй-бүлөсүнө, жакындарына жана окурмандарына көңүл айтты.
"Сооронбай атабыз бийик адамгерчилиги, тактыгы, калыстыгы, сыпайылыгы, маданияты менен калкына жаккан, чыгармачылыктын байсалдуу жолун баскан, ошол чыгармачылыгы менен кылымдар бою өлбөстүк тапкан адам эле", — деди өкмөт башчы.
Улуу Ата Мекендик согуштун ардагери, Токтогул сыйлыгынын ээси, Кыргыз Эл баатыры, залкар акын Сооронбай Жусуев "Ала-Арча" көрүстөнүнө коюлду.
