Москвадагы өрттөн күйөөсү менен баласын жоготкон келин ымыркайы менен КРге учуп келди

БИШКЕК, 11-фев. — Sputnik. Москва шаарындагы тигүү цехинде чыккан өрттөн күйөөсүн жана баласын жоготкон Айида аттуу жаран Кыргызстанга учуп кеткенин Москва шаарында иштеп жүргөн Жылдыз Осмонова билдирди.

Белгилей кетсек, 2016-жылы 30-январда Москва шаарынын Сокольники аймагындагы Стромынка көчөсүндөгү өнөр жай имараттарынын биринен өрт чыгып, 3 миң чарчы метри күйүп кеткен. Анын кесепетинен имараттын чатыры кулап, 12 адам каза тапкан. Анын сегизи Кыргызстандын жараны, экөө — Россиянын жарандыгын алган кыргыздар жана өзбекстандык эки жаран экендиги белгилүү болгон. 

Осмонованын айтымында, жакындарынан ажыраган келинге Москва шаарындагы кыргызстандыктар материалдык жардам чогултуп беришкен.

"Мекендештер Айидага кийим-кечеден сырткары 46 миң 528 рубль чогултуп беришти. Ал уулунун атын Тариэль деп коюптур. Алар капысынан эле Кыргызстанга учуп калышты. Андыктан чогултулган жардамды аэропортко барып тапшырдык", — деди ал.

Осмонова ымыркайдын төрөлгөнүнө 11 күн болгонун белгиледи.

11-февралда өрттөн каза болгон алты кишинин сөөгү Москва — Ош аба каттамы аркылуу Кыргызстанга алып келинди.

Өзгөчө кырдаалдар министрлиги тарабынан сөөктөрдү жеткирүү үчүн КамАЗ жана Нива үлгүсүндөгү унаа бөлүнүп, саат 07:50дө жүк Баткен облусуна карай багыт алган.