БИШКЕК, 11-фев. — Sputnik. Быйыл 12 миллиард сомго чейинки каражат насыя түрүндө бериле турганын Жогорку Кеңештин жазгы талаа жумуштарына даярдык маселесин талкуулаган жыйынында премьер-министр Темир Сариев билдирди.
Өкмөт башчы айыл-чарба тармагында дыйкандарды колдоо максатында жеңилдетилген насыяларды берүү улантыларын айтып, быйылкы жылдан тарта насыянын мөөнөтү эки жылдан үч жылга узартылып, 10 пайыз менен берилип жатканына токтолду.
"Кыргыз-орус өнүктүрүү фонду аркылуу 12 пайыз менен жеңилдетилген насыялар берилет. Быйылкы жылга 12 миллиард сомго чейинки каражат насыяга каралган. 100 миң сомго чейинки насыяны күрөөсүз бериле баштады", — деди Сариев.
Расмий маалымат боюнча былтыркы жылы 9980 субъектиге 3,8 миллиард сом жеңилдетилген насыя берилген. Ал эми өкмөт тарабынан 2011-жылдан бери 51 миңден ашуу айылдык ишкерлерге 13 миллиард сомдук насыя каражаты берилди.
