Коомчулук эки тарапка бөлүнүп, кай бири сүйүү майрамын белгилөөнү колдосо, айрымдар андан баш тартышат.
"Сүйүү кызык, сүйүү таттуу бир башка, кимдер сүйбөйт дени таза жаш чакта", — деп алп акын Алыкул Осмонов бекеринен айтпаса керек.
Бул макала сиздин кайсыл тарапта экениңизди тактоого жардам берет. Анда чогуу таразага салып көрөлү.
Сүйүү майрамын белгилөө үчүн 7 себеп:
- Сүйүү — эң назик, акактай тунук, аяр, керемет сезим. Сүйүүнүн арты менен нечендеген шедевр чыгармалар жаралып, адам баласынын тукуму уланып келет. Бул сезимдин бар экенинин өзү майрам.
- Бул күн ашык болуп жүргөндөр үчүн агынан жарылып сүйүүсүн билдирүүгө сонун мүмкүнчүлүк.
- Ооба, сүйүшкөндөр үчүн ар бир күн майрам. Бирок көр тирилик менен ал нерсени унутабыз. Бул күн эске салып, сүйүктүүлөр бири-бирине белек беришет. Болбосо жылдап бири-бирине белек бербеген жубайлар арбын.
- Ушундай улуу сезимге 365 күндө 24 саат бөлүп койсо ашыкча болбойт. Дегеним, күндөгүдөй эмес, башкача жылуу мамиле, сонун кечки тамак.
- Сиз менен биз — сүйүүнүн мөмөсүбүз. Андыктан сүйүү дарагын сугарып коюу ашыкча болбойт.
- Мектеп окуучуларына 14-февраль өзгөчө күн. Анткени каттар үчүн коюлган кутучаны пайдаланып, жактырган адамыңа кат жазып, же ал адамдан кат алып калышың мүмкүн.
- Эң башкысы, бул күнү сүйүүдө тоңуп турган жүрөктөрдү махабаттын улуу оту жылытып, ашыктык сезимдерин тутантат. Ар кыл майрамдык иш-чаралар, концерттер буга көмөктөшөт.
Сүйүү майрамынан баш тартууга 7 себеп:
- Бул майрам мусулманчылыкка каршы келет. Анткени дин никеге чейинки сүйүү мамилесине тыюу салат.
- Кыргыз элинин менталитетине жат көрүнүш. Улуулардын көзүнчө сүйүшөт элем деп кыргыздын улан-кыздары жетелешип жүргөнү өөн учурайт.
- Ашыкча чыгым. Жигиттердин чөнтөгүнө зыян.
- Эң негизгиси бул күнү бейчеки баскандар көп болот. Дарыгерлердин айтымында 14-февралдын кесепетинен улам боюнан алдырган кыздар арбын.
- Сүйүүгө жамынган тың жигиттер кыздарды алдап, намысын талкалашат.
- Сүйүшкөндөр үчүн күн сайын майрам.
- Жетелешип жүргөндөр жалгыздардын кыжырын келтирет.
Бул майрамды белгилөө, же баш тартуу ар бир адамдын өз эрки. Бирок Кыргызстанда акыркы жылдары жаштар арасында колдоо таап келет.
14-февраль — сүйүү же "Валентин" күнү деп аталып, Европада XIII кылымдан бери, Америкада 1777-жылдан тарта, ал эми КМШ мамлекеттеринде 1990-жылдан баштап белгилене баштаган. Бул күнгө христианин Валентин себепчи болгон. Окуянын өзөгү реалдуу чындыкты түзгөнү менен жөн гана уламышка айланып калган. Рим императору Юлий Клавдий II империя солдаттарынын үйлөнүүсүнө тыюу салган. Валентин түгөйлөрдү жашыруун түрдө үйлөндүрүп турган. Муну билип калган император биздин заманга чейинки 269-жылы аны өлүм жазасына тартууну буюрган коёт.
