БИШКЕК, 15-фев. — Sputnik. Ош шаарында Афганистандан советтик жоокерлердин чыгарылышынын 27 жылдыгына арналган аза күтүү болду.
Ага Ош шаарынын биринчи вице-мэри Замирбек Аскаров, Өкмөттүн Ош облусундагы ыйгарым укуктуу өкүлүнүн орун басары Байыш Юсупов, Россиянын Ош шаарындагы башкы консулу Александр Кудряшов, Ооган согушунун катышуучулары, курман болгон жоокерлердин үй-бүлөлөрү, шаар тургундары катышты.
Алгач, эстеликке гүл чамбарлар коюлуп, согушта курман болгон жоокерлерди үнсүз эскеришти.
"Бул алааматтан жүздөгөн кыргыз-афганчылар кайтпай калышты. Алар кезегинде өзүнүн интернационал жоокердик милдетин аткарышты", — деди Аскаров.
Ал ардагерлерге Ардак Грамота менен 500 сомдук акчалай сыйлыктарды жана 1000 сом өлчөмүндөгү стипендияларды тапшырды.
Афганистан согушунун ардагерлеринин төрагасы Беделбай Маматовдун айтымында, бүгүнкү күндө Ош облусунда Афганистан согушунун 1 600, ал эми Ош шаарында 418 ардагери жашайт.
"Бул согушка Ош облусунан 4500 жоокер аттанып, анын ичинен 751 мекендештерибиз кайтпай калган",— деди ардагер.
Кыргызстандан Афганистанга 7142 жоокер жөнөтүлгөн.
1989-жылдын 15-февралында Афганистандан советтик жоокерлер толугу менен чыгарылып кеткен. Ал эми аталган аймактагы согуш советтик жоокерлер киргизилген күндөн — 1979-жылдын 25-декабрында башталган деп эсептелет. Алар аталган аймакта афгандык моджахеддер (душмандар) менен согушкан.
