БИШКЕК, 18-фев. — Sputnik. Кыргызстандын футзал боюнча курама командасы япон оюнчуларын 6:2 эсебинде утуп алды.
Бул оюн 2016-жылы Колумбияда өтүүчү футзал боюнча дүйнө биринчилигине жолдомо алуунун алкагында болду. Кыргызстан дагы бир команданы жеңсе, аталган дүйнө биринчилигине жолдомо алат.
Буга чейин аталган эки команда Азия биринчилигинин алкагында тогуз ирет кез келип, кыргызстандык футболчулар бир дагы ирет жеңген эмес.
Кечээ күнү Азия биринчилигинин чейрек финалында Кыргызстандык футболчулар Ирандын командасына 7:0 эсебинде утулушкан.
Азия биринчилигинде жарым финалга Иран, Өзбекстан, Вьетнам жана Таиланд командалары өтүштү. Алар автоматтык түрдө футзал боюнча дүйнө биринчилигине жолдомо алышты.
Кыргызстан аталган биринчиликте медаль алуу укугун жоготкону менен дүйнө биринчилигине жолдомо алуу мүмкүнчүлүгү бар.
