БИШКЕК, 25-фев. — Sputnik. Жумгал районунун Баш-Кууганды айылында мындан эки күн мурда коёнго ууга чыгып, ок жеп кансырап каза болгон бала бүгүн жерге берилди. Бул туурасында Баш-Кууганды айыл өкмөтүнүн жооптуу катчысы Жибек Ботоканова Sputnik Кыргызстан маалымат агенттигине билдирди.
23-февралда Жумгал районундагы Баш-Кууганды айылынын Шатман Садыбакасов атындагы орто мектептин онунчу жана тогузунчу класстарынын окуучулары коёнго ууга чыгып, бирине ок жаңылган. Ок жеген бала ооруканага жетпей, кансырап, жолдо каза болгон.
"Балдар Баш-Кууганды коктусуна коёнго аңчылыкка чыккан. Алардын бири — 9-класстын окуучусунун аткан огу ташка тийип, кайып келип, экинчисине тийген. Кырсык болгон жерге автоунаа каттабагандыктан, башынан жаракат алган 10-класстын окуучусу кансырап, ооруканага жетпей, орто жолдо көз жумган. Ал бүгүн жерге берилди", — деп билдирди Ботоканова.
Анын айтымында, ууга чыккан балдар жакын дос жана таяке-жээн болгон. Ал эми мылтык ок чыгарган 9-класстын окуучусунун атасына тиешелүү экендиги айтылууда.
Нарын облустук Ички иштер башкармалыгынын башчысы Ороз Молдосариев окуя боюнча Кылмыш жаза кодексинин 97-беренесинин негизинде кылмыш иши козголгондугун билдирди.
"Алар туугандык байланыштарын, бала кокустуктан каза болгонун айтышууда. Учурда 9-класстын окуучусу ата-энесинин колунда болуп турат", — деди Молдосариев.
Каза болгон бала төрт бир тууган, 80 жаштагы атасынын кеч көргөн уулу экендиги айтылууда.
