БИШКЕК, 27-фев. — Sputnik. Бишкек шаарындагы СИЗО-1ден окуя болгон жерге алып келинген жарандын качып кетиши боюнча аны коштоп келген күзөтүү кызматынын аракетине баа берилет. Бул тууралуу ИИМден билдиришти.
Маалыматтарга караганда, соттолуп жаткан адам тергөө иштерин улантуу максатында окуя болгон жерге алып келингенде качып кеткен. Алдын ала маалымат боюнча ал май куюучу жайдын кызматкеринин жарым миллион сомдон ашык акчасын карактаган деп кармалган.
Айыпталуучу жаранды коштоп келген күзөтүү кызматынын аракеттерине эксперттер баа берелерин, анын жыйынтыгы чыгарын ИИМден кошумчалашты.
"Айыпталуучуну коштоп келген Аламүдүн РИИБдин күзөтүү кызматынын аракеттерине эксперттер баа беришет. Алар кандай автоунаа менен барышкандыгы, айыпталуучу кандай жагдайда качып кеткени аныкталат. Анын жыйынтыгы меен кызматкерлердин аракеттерине баа берилет", — деп ИИМден билдиришти.
Ички иштер министрлигинен маалымдашкандай, СИЗО-1ден тогуз кишини сурак үчүн алып чыгышкан. Алардын сегизи камак жайына кайтарылган. Буга чейин Жазаларды аткаруу мамлекеттик кызматы (ЖАМК) СИЗО-1ден беш кишини суракка алып кетишкенин билдирген.
ЖАМКтын маалымат катчысы Александр Никсдорф СИЗО-1дин кызматкерлери РИИБге үч жолу чалган.
"Биздин кызматкерлер Аламүдүн райондук ички иштер бөлүмүнө түнкү саат 21.00дө, 21.30да жана 22.00дө чалышкан. Акыркы жолу чалганда айыпталуучу саат 21.10до качып кеткенин айтышты", — дейт Никсдорф.
Маалымат катчысы Жазаларды аткаруу мамлекеттик кызматынын ыкчам тобу качып кеткен жарандын жашынган жерин аныктоо боюнча аракеттерди көрүп жатканын кошумчалады.
Өзгөчө белгилери: бою 185-190 сантиметр, бети тегерек, чачы кыска. Кызыл түстөгү спорттук кийим, кара шым, кара баш кийим жана кара түстөгү бут кийимчен болгон.
Бул жаран тууралуу кандайдыр бир маалымат билгендер (0312) 36-35-23, же 0(312) 43-01-27, (0701) 655568; 0701655571, 0552 888838 телефондоруна чалса болот.
