Түркмөнстандык айымдар 8-мартка карата 11 доллардан белек алышат

БИШКЕК, 28-фев. — Sputnik. Түркмөнстандын айымдары 8-март Эл аралык айымдар күнүнө карата президенттен 40 манаттан (11 доллардан көбүрөөк) ала турганын түркмөн телевидениесине шилтеме берүү менен Sputnik Армения агенттиги билдирди.

Тийиштүү буйрукка өкмөт жыйынында өлкө башчы Гурбангулы Бердымухамедов кол койгон.

Президенттин токтомуна ылайык, аталган белек менчик формасына карабастан өлкөнүн бардык ишкана, мекеме жана уюмдарында иштеген айымдарга берилмекчи.

Мындан тышкары, акчалай белек пенсия жана мамлекеттик жөлөк пул алгандар, аспирантура, докторантура, клиникалык ординатурада окугандар, студенттер, окуучулар жана бала бакчага барган кичинекей кыздарга чейин тапшырылат. Бул белек 1-5-март күндөрү берилип бүтүшү керек.

Түркмөнстанда Эл аралык аялдар күнүнө карата көйнөктөр үчүн кездемелер эң популярдуу белек болуп саналат. Алардын баасы болжол менен 40 манаттын чегинде. Түркмөнстандык аялдарга акчалай белек берүү салтын өлкөнүн биринчи президенти Сапармурат Ниязов баштаган. Бул майрам советтик доорду эске салбашы үчүн түркмөнбашы аялдардын майрамын Ноорузга туштап өткөрүүнү буюрган.

Аталган өлкөдө 8-март майрамын белгилөөнү президент Гурбангулы Бердымухамедов 2008-жылы калыбына келтирген.