БИШКЕК, 2-мар. — Sputnik. Москвадагы кыргызстандык балдар жумуштан кеч чыккан мекендеш кыз-келиндерди үйүнө чейин коштоп, барып алардын коопсуздугун камсыз кылууда. Бул тууралуу Москва шаарында иштеп жаткан Жылдыз Осмонова өзүнүн Facebook баракчасына жазды.
Москвадагы 40 чороАдилет Чилдебаевдин демилгеси менен Москвада түнгө чейин иштеген кыз-келиндер, эже-сиңдилерди кечээк…
Опубликовано Жылдыз Осмоновой 2 марта 2016 г.
Жаңы демилгени көтөрүп чыккан мекендештер кыз-келиндердин караңгыда түрдүү кырдаалдарга туш келип калбашын көздөйт.
Анын бул демилгесин көпчүлүк мекендештер туура кабыл алып, кыз-келиндерди түндө жашаган жерине чейин узатып башташкан. Алардын бири Якуб Аматкулов кечээ бир кызды үйүнө чейин жеткирип барганын Sputnik Кыргызстан маалымат агенттигине билдирди.
"Мен "Одноклассники" сайтында жумуштан кеч чыккан эже-карындаштарды түндө үйүнө чейин узатып коюу боюнча билдирүүнү окуп, өз номеримди калтырып койгом. Кечээ бир кызды үйүнө чейин жеткирип бардык", — дейт ал.
Москва шаарында ресторанда иштеген Адилет Жоомартбек уулу жумуштан кеч чыккан кыз-келиндерге жардам берип, аларды коштоп баруу боюнча жардамын сунуштаган мекендештердин саны көбөйүп жатканын кошумчалады.
Расмий маалыматтар боюнча Россиянын аймагында жарым миллиондой кыргызстандык бар.
