Майрамга келген аялдар улуттук кийимчен чыкса, эркектер башына ак калпак кийишти.
БИШКЕК, 5-мар. — Sputnik. Жалал-Абад шаарынын борбордук "Эркиндик" аянтына 10 миңдей киши калпак күнүн белгилөө үчүн жөө жүрүшкө чыкты. Бул тууралуу Жалал-Абад облустук ички иштер башкармалыгы билдирди.
Иш-чарага облус аймагындагы диаспоралардын өкүлдөрү да катышууда.
Маалыматка ылайык, майрамга катышуу үчүн облустун аймактарынан да кишилер келген.
"Шаардын төрт тарабынан адамдар облустук администрациянын маңдайындагы борбордук "Эркиндик" аянтын көздөй жөө жүрүшкө чыгышты. Аялдар улуттук кийимдерди кийген болсо, эркектер башына ак калпак кийишти", — деп айтылат билдирүүдө.
Милиция кызматкерлери коомдук тартипти сактоо үчүн күчөтүлгөн режимде иштеп жатат.
Иш-чарага облус аймагындагы диаспоралардын өкүлдөрү да катышууда.
Ак калпак күнүн белгилөө демилгесин коомдук активисттер көтөрүп чыккан. 2011-жылдын 5-мартынан тарта ак калпак күнү өлкөнүн бардык облус райондорунда белгиленип келет.
