БИШКЕК, 10-мар. — Sputnik. 27-мартта 22 айыл өкмөтүндө жана алты шаарда жергиликтүү кеңештерге шайлоо өтөт. Алар: Ош, Каракол, Балыкчы, Майлуу-Суу, Токмок жана Кемин шаарлары. Шайлоодо 264 миң кыргызстандык өз добуштарын бере алат.
Бул саясий өнөктөштүктө түрдүү партиялар ат салышып, шайлоочуларды өзүнө тартканга аракет кылышат. 25 партия шаардык кеңешке болгон шайлоого катыша турганын билдирди. Алардын бир бөлүгү бардык жергиликтүү кеңештерге ат салышса, айрымдары бир канча эле шайлоого катышат.
Алты шаарда боло турчу шайлоодо негизинен КСДП, "Өнүгүү — Прогресс", "Эмгек", "Ата Мекен" жана "Республика — Ата-Журт" партиялары катышат.
Шаарлар боюнча алып караганда эң көп партия Балыкчы шаардык кеңешке болчу шайлоого катышат. Анда 14 партия бир-бири менен күч сынашат. Андан кийинки орунда 13 партия менен Ош жана Каракол шаарлары турат. Токмок шаардык кеңешке 12 партия, Кеминде 10 жана Майлуу-Суу шаардык кеңешке болгону – беш партия ат салышат.
Каракол шаардык кеңешке болгон шайлоодо 13 партиядан 654 талапкер 31 орун үчүн ат салышат. Башкача айтканда бир орунга 21 киши туура келет.
Ал эми Ош шаарында атаандаштык мындан да күч. Шаардык кеңештеги 45 орун үчүн 13 партиянын 1042 талапкери ат салышууда, бир орунга 23 киши туура келет.
