БИШКЕК, 17-мар. — Sputnik. Казакстандын парламенти "Балдар кызыкчылыгын коргоо жөнүндө" мыйзамына толуктоолорду киргизип, өлкөдөгү педофилдерге химиялык бычуу жазасы колдонулмай болду. Бул тууралуу Новости-Казакстан маалымат агенттиги билдирди.
Маалыматка ылайык, кабыл алынган мыйзам үй-бүлө, нике тууралуу кодекске өзгөртүү киргизип, кароосуз калган балдардын маалымат базасын түзүүгө шарт түзөт.
Муну менен бирге Жогорку палатанын сенатору Бырганым Айтимова балдарга карата сексуалдык зордук-зомбулук жасаган кылмышкерлерди бычуу тууралуу мыйзам кабыл алынганын белгиледи.
"Химиялык бычуу — бул адамдын жыныстык катнашка баруу жөндөмүн убактылуу токтотуу. Ал педофилдерге бир ирет сайылат. Инъекция соттук чечими менен ишке ашат", — дейт эл өкүлү.
Учурда өлкөдө беш миллиондон ашуун бала жашап, тогуз миңи балдар үйүндө тарбияланат.
