БИШКЕК, 20-мар. — Sputnik. Патрулдук милицияга Жол кайгуул кызматы менен Кайгуул посттук кызматтарынын бардык функциялары бериле турганын ички иштер министри Мелис Турганбаев билдирди.
ИИМдин маалымат кызматы билдиргендей, Турганбаев "Патрулдук милициянын" өздүк курамы менен жолугуп, анын даярдыктары менен таанышты. Аталган кызмат 1-апрелден тарта ишке кирет.
Турганбаевдин айтымында, автоинспекторлордун жоюлушу менен жолдо баш аламандык болот деп чочулоого негиз жок.
"Эгер патрулдук милициянын кызматкерлери мамлекеттик номери жок автоунааларды көрсө, же мас абалындагы айдоочуну байкаса аларды токтотууга толук укуктуу", — дейт министр.
ИИМ башчысы ошондой эле, Жол кайгуул кызматы менен Кайгуул посттук кызматтарынын бириктирилиши бир катар өлкөлөрдө болгонун кошумчалады.
"Долбоор иштеп баштагандан кийин бир нече түзөтүүлөр киргизилет. Себеби, эмнелер болорун алдын ала айтууга мүмкүн эмес. Андыктан биз жарандарды эгер оңтойсуз учурлар болсо туура түшүнүү менен мамиле кылышын өтүнөбүз", — дейт Турганбаев.
Жаңы кызмат Патрулдук милициянын башкы башкармалыгы деп аталат.
