БИШКЕК, 25-мар. — Sputnik. Окуучулардын республика боюнча өткөрүлгөн театралдык фестивалы бүгүн, 25-мартта жыйынтыкталып, жеңүүчүлөр аныкталды. Бул тууралуу Маданият, маалымат жана туризм министрлиги билдирди.
Эскерте кетсек, театрды өнүктүрүү, ошондой эле Тарых жана маданият жылына карата аталган министрлик тарабынан уюштурулган фестиваль өлкөнүн райондорунда 25-январга чейин өткөрүлүп, тандалган спектаклдер кийинки турга жолдомо алышкан.
Экинчи айлампа бардык облустар менен Бишкек жана Ош шаарларында 25-февралга чейин өтүп, мыкты чыгармалар аныкталган.
Үчүнчү айлампасы 23-мартта Бишкекте башталып, эки күнгө уланды.
Калыстар тобунун чечимине ылайык, баш байгеге Чыңгыз Айтматовдун повестинин негизинде коюлган "Найман эне ыйы" аттуу спектакль менен Сокулук районундагы Новопавловка айылынын №1 лицейи ээ болду. Сыйлык иретинде жеңүүчүгө 80 миң сом ыйгарылды.
Экинчи орунга Токтогул районунун №27 орто мектеби ээ болду. Абдырамановдун варианты боюнча "Курманжан Датка" чыгармасын сахналаштырып, 50 миң сом алышты.
Үчүнчү орунду Бексултан Жакиевдин "Алтын аяк" чыгармасынын негизиндеги спектакли менен Бишкектин №38 мектеби ээледи. Аларга 30 миң сом өлчөмүндөгү сыйлык тапшырылды.
Мындан тышкары, башка катышуучуларга кызыктыруучу сыйлыктар берилди.
