БИШКЕК, 25-мар. — Sputnik. Дүйнөлүк банк Кыргызстандын шаарларды өнүктүрүү долбоору үчүн 12 миллион доллар бөлүү чечимин кабыл алганын аталган банктын өкүлчүлүгү билдирди.
Маалыматка ылайык, каражаттын 6,6 миллион доллары жеңилдетилген насыя катары берилсе, калган 5,4 миллион доллар грант түрүндө бөлүнүүдө.
Шаарларды өнүктүрүү долбоору республиканын бир катар калктуу пункттарындагы объектилердин сейсмикалык туруктуулугун камсыздоого жана энергетикалык натыйжалуулугун арттырууга багытталган.
"Долбоордун алкагында Кербен жана Сүлүктү шаарларын суу менен камсыздоо системасын жакшыртуу, Балыкчы менен Токтогул калааларын жарыктандыруу жана таштандыдан арылуунун жолдору каралган", — деп айтылат билдирүүдө.
Шаарларды өнүктүрүү долбоору 2016-2020-жылдардын аралыгында Мамлекеттик архитектура, курулуш жана турак жай-коммуналдык чарба агенттиги менен биргеликте ишке ашырылат. Ал эми кыргыз өкмөтү бул долбоорго 2,4 миллион доллар каражат салат.
