БИШКЕК, 27-мар. — Sputnik. Ош шаарында шайлоо тынч өттү. Бул тууралуу Мамлекеттик каттоо кызматынын төрагасы Тайырбек Сарпашев маалымат жыйында билдирди.
Сарпашев баардык шайлоочуларга ыраазычылык билдирди.
"Ош шаарынын тургундары активдүүлүгүн көрсөтө алды. Шайлоодо майда барат маселелер жаралганы менен одоно мыйзам бузуу катталган жок", — деди Сарпашев.
Ал 23 шайлоо участогуна барып, маселени жеринен көзөмөлдөп турганын айтты.
"Ош боюнча 117 миң 752 шайлоочудан 70 миң 651и добуш берди. Шаар боюнча 10 пайыз техника бир аз убакытка иштебей калганы болбосо, дээрлик баары жакшы өттү", — деди Мамлекеттик каттоо кызматынын төрагасы.
Сарпашев ошондой эле, күзүндө боло турчу шайлоо дагы жакшы өтөт деп үмүттөнүп жатканын айтты. Бул шайлоого караты жаңы ыкма менен электрондук тизме түзүлөт. Өзүн тизмеден таппагандар боюнча дагы тактайбыз, деп кошумчалады.
Ал ошондой эле, компьютерлердин иштебей калганы операторлордун билбестигинен улам болгонун айтты. Андыктан операторлорду окутуу боюнча маселени карап жатканын белгиледи.
Шаардык кеңештин депутаттарын шайлоого жалпысынан 117 миң 752 шайлоочунун катышуусу күтүлүп, алардын 872си кечээ мөөнөтүнөн мурда добуш беришкен.
Эскерте кетсек, бүгүн 27-мартта жергиликтүү кеңештерге шайлоо алты шаар менен 20дан ашуун айыл өкмөттөрүндө өтүп, анда биометрикалык маалымат тапшырган 271 миң жаран добуш берүү укугуна ээ болгон.
