БИШКЕК, 29-мар. — Sputnik. Жол кайгуул кызматынын жетекчиси Зумрад Жанабаева ооруканага жаткырылды. Бул тууралуу Sputnik Кыргызстан агенттигине күч органдарындагы булак билдирди.
Жанабаева кызмат абалынан кыянаттык менен пайдаланган жана документтерди жасалмалаган деген шек менен өткөн бейшемби күнү Октябрь райондук прокуратурасы тарабынан кармалып, Бишкек ШИИБнын убактылуу кармоочу жайына киргизилген.
Ишемби күнү сот аны камакта 17-апрелге чейин калтыруу боюнча чечим чыгарган.
Жаза аткаруу мамлекеттик кызматы Жанабаева азырынча №1 тергөө абагына алып келине электигин маалымдады. Милициянын айтымында, ал убактылуу кармоочу жайда кармалып, жүрөгү ооруп жатканын айткан. Күч структурасындагы булак Жанабаева түндө Улуттук госпиталдын реанимация бөлүмүнө жаткырылганын билдирди.
