БИШКЕК, 2-апр. — Sputnik. Жума күнү режиссер Мирлан Абдыкалыковдун "Сүтак" тасмасы "Ника" киносыйлыгынын "КМШ жана Балтика өлкөлөрүнүн мыкты тасмасы" номинациясында жеңишке жетишти.
— Саламатсызбы, жеңиш кут болсун!
— Рахмат. Бирок чынын айтсам, бул менин эле эмес, жалпы эмгек жамааттын жеңиши. Ага кошуп жалпы кыргызстандыктарды куттуктап кетким келет.
— Сыйлык тууралуу кантип билдиңиз?
— Аз жерден уктап кала жаздадым (күлүп). Үй-бүлөбүз менен сыйлык тапшыруу аземин Интернеттен көрөлү деп отурганбыз. Бирок жакшы көргөзбөй койгонунан смартфонума эскертүү коюп, уктап калдым. Биринчи куттуктоону СМС билдирүү аркылуу алдым десем болот.
— Москвага эмнеге өзүңүз барган жоксуз?
— Баары келип эле акчага такалат да. Кыргызстандын Россиядагы элчилигине кайрылып, салтанатка катышып бергиле деп өтүнгөнбүз. Билгендей, ырас, аракетибиз текке кеткен жок.
— Атаңыз эмне деди?
— Мен аны түн ичинде аэропорттон тосуп алдым. Германияда "Кентавр" тасмасынын үстүндө иштеп жатат да. Сураганынан болгонун айтсам, тамаша катары кабыл алды. 1-апрель эмес беле. Анан ишенип, куттук айтты. Бул жеңиш чынында ага да таандык. Мен ага аябай ыраазымын.
— Эми эмне менен алек болоюн деп атасыз?
— Иштейбиз да. Мен эми начар тасма тартууга акым жок (күлүп). Чынында сыйлык чоң кубаныч менен бирге ири жоопкерчиликти да жүктөйт эмеспи. Ишенимден тайбаганга аракет кылам.
— "Оскар" сыйлыгына дагы бир чамынып көрөсүзбү?
— Албетте. "Сүтак" узун тизмеге кирип, бирок андан ары кете албай калды. Кыргызстанга "Оскар" алып келе ала турган мыкты режиссерлор көп.
